Myto Domowiny, Myto Domowiny za dorost a čestne znamješko spožčili
Budyšin (SN/at). „Hdyž dobru zhromadnosć hajimy a wo přezjednosć so prócujemy, słuži to wšitkim.“ Tale mysl z dźaknych słowow Jurja Špitanka móhła hesło być za mytowanske zarjadowanje Zwjazkoweho předsydstwa Domowiny pjatk w Budyskim Serbskim domje.
Domowina bě lěto 2016 za Smolerjowe lěto wuwołała. Tuž je jeje předsyda Dawid Statnik w swojim witanju na wuznamneho wótčinca skedźbnił: „Smoler je ze swojim skutkowanjom mězniki stajał. Wone su nam wjace hač orientacija: Wone stachu so z krutym wobstatkom našeho žiwjenja.“
