Njewotwisna přirada so prěni raz w Budyšinje schadźowała

Budyšin (SN/BŠe). „Serbska młodźinska přirada je rěčnik a wobličo serbskeje młodźiny“, wuzběhny kubłanska referentka Domowiny za młodźinu Rejzka Krügerowa. Sobotu schadźowaše so zjednoćenstwo młodostnych prěni raz w Budyskim Serbskim domje ke konstituowacemu posedźenju. Přiradźe přisłušeja Lukaš Hrjehor za Serbskich skawtow, Damian Dyrlich za Zwjazk serbskich studowacych, Janek Süß za towarstwo Serbska murja, Jan Brězan za Smječkečanski młodźinski klub, Fran­ciska Grajcarekec za towarstwo Pawk, Stanij Handrik za Wudworski folklorny ansambl, Katka Pöpelec za Smjerdźečansku rejwansku skupinu, Ławrjenc Handrik za Serbskopazličanski a Jo­hanna Cyžec za Wotrowski młodźinski klub. „To je sylny politiski signal, zo so dźewjeć cyłkow pod jednej třěchu zjednoća“, kubłanska referentka Domowiny podšmórny. A dalši zajimcy móža młodźinskej přiradźe kóždy čas přistupić, wšako je wotewrjena.