Wukrančicy žaruja wo muža, kiž je poł lětstotka na dobro wsy skutkował. Minjeny kónc tydźenja su Wolframa Lorenca, wučerja a sportoweho horliwca, na wjesnym kěrchowje pochowali. Wolfram Lorenc, rodźeny 12. julija 1939 w Barće, bě po wjelelětnej ćežkej chorosći 26. nowembra zemrěł.
Syn wjesneho serbskeho dźěłaćerja chodźeše wot lěta 1953 na Serbsku wyšu šulu w Budyšinje. Po studiju wučerstwa na Serbskim wučerskim wustawje zasydli so we Wukrančicach. Jako wučer za serbšćinu a němčinu zasadźeše so wot prěnjeho dźěłoweho dnja lěta 1960 za serbsku wučbu w kónčinje, kotraž bě hižo tehdy nimale dospołnje přeněmčena a wuwiwaše tamnišu šulu sobu na nowočasne, we wsy připóznate kubłanišćo.
