Zwjazkowe předsydstwo Domowiny namołwja serbske towarstwa a zwjazki, namjetować kandidatow za wólby noweje rady Załožby za serbski lud za dobu wot lěta 2019 do 2023.
Narć (SN/JaW). Na posedźenju Zwjazkoweho předsydstwa Domowiny 19. oktobra chce gremij wólbny porjad za wuzwolenje přichodnych serbskich čłonow rady Załožby za serbski lud ze Sakskeje schwalić. To su čłonojo na swojim posedźenju minjeny w pjatk w Narćanskim wobydlerskim domje wobzamknyli. Wólby serbskich zastupnikow do rady chcedźa 14. decembra wotměć, připowědźi předsyda Domowiny Dawid Statnik.