Myta a čestne znamješka Domowiny 2018 přepodate
Budyšin (SN/MiR). Swjatočna atmosfera knježeše na wuznamjenjenskim zarjadowanju z hudźbu Jana Brězana ze Smječkec na žurli Budyskeho Serbskeho domu. Předsyda Domowiny Dawid Statnik witaše zańdźeny pjatk syłu hosći na lětuše spožčenje Myta Domowiny, dalšich za Myto Domowiny za dorost kaž tež za čestne znamješko narodneje organizacije. „Waš angažement, waša rozžahłosć a kreatiwita su stołpy, kotrež tworja zakład nahladnosće a kompetency Domowiny“, rjekny Dawid Statnik w swojej swjedźenskej narěči.