Na wopyće pola Měrki Kozeloweje w Stróži pola Hućiny
Měrka Kozelowa ze Stróže pola Hućiny je zbožowna, zo je zaso strowa a zo móžeše 22. oktobra w kruhu swojich lubych a přećelow 75. narodniny swjećić. Bjesaduju z jubilarku a jeje mandźelskim Sieghardom při šalce kofeja a skibce tykanca. Krasny mamy wid z terasy na wulku zahrodu a za njej na zybolacu wodu Olbaskeho jězora.
Wobaj staj wot lěta 1966 zmandźelenaj. Woženjenaj synaj, Hajko a Bolko z mandźelskimaj a synami Kitom Měrosławom, Aljošu a Kolju, su so maćeri, přichodnej maćeri a wowce k narodninam za wšu prócu wosebje dźakowali.
Prócu a dźěło jubilarka hižo wot dźěćatstwa sem znaje. Doma w Narću je tehdyša Měrka Hajnkec hižo jako dźěćo w domjacym ratarstwje na polu a w hródźi dźěłać dyrbjała. Staršej sej přeještaj, zo wona jako najmłódša z třoch dźowkow jónu swójbne małoratarstwo přewozmje. „Mój nan bě wjelelětny předsyda Domowinskeje skupiny w Narću. Mać chodźeše we Wojerowskej drasće, a doma smy serbsce rěčeli“, jubilarka powěda.
