Wudworski ansambl so dale womłodźił

Serbske Pazlicy (SN/mwe). Serbski folklorny ansambl Wudwor (SFAW) ma tuchwilu 24 rejwarjow 8. do 12. lětnika a dorostowu skupinu, kotrejž přisłuša něhdźe 24 holcow a hólcow w starobje do 16 lět. Cyłkowny nawod kulturneho ćělesa, do kotrehož je tež znaty a wob­lu­bowany muski spěwny cyłk Přezpólni zawjazany, ma Serbskopazličan Stanij Handrik. Městopředsyda ansambla je jeho bratr Ambrož. Wo drastowy fundus rejwarjow stara so Lucija Smolic, a pokładnik je Jurij Smoła, wobaj z Wěteńcy.

„Dorostej so přeco zaso nowi přidružeja. Su pak tež hdys a hdys wotchady. Zwjetša su to hólcy, kotřiž drje radšo ko­pań­cu hraja“, Ambrož Handrik zwěsća. Swěru pak jězdźa wšitcy „Wudworčenjo“ kóždy pjatk a sobotu nawječor z Ha­slo­wa, Hózka, Wotrowa a Kanec kaž tež z Njebjelčanskeje wokoliny a dalšich wsow do Chróšćanskeje hale „Jednota“ na zwučowanja. Wulku skupinu nawjeduje swobodnje skutkowacy choreograf, něhdyši rejwar SLA, Kornel Kolembus ze Słowakskeje, wo dorost stara so bywši rejwar Wudworčanow Měrćin Handrik ze Serbskich Pazlic.