Kubłanske prašenja a starosće Serbski wječor w Malešecach postajeli
Malešecy (SN/at). Stajne blido staršich přeje sej Karolina Pfuhl. Tam móhli sej nanojo a maćerje wšelake serbske wobroty přiswojić. Na te wašnje hodźało so doma to rěčnje skrućić, štož jich dźěći wodnjo w Malešanskej Witaj-pěstowarni wuknu a nałožuja.
Namjet bě jedyn z wjacorych, kotrež je něhdźe 20 wobdźělnikow na Serbskim wječoru wčera w Malešanskim „Wódnym mužu“ rozjimało. Předsyda Domowiny Dawid Statnik, předsydka a čłonka sakskeje Rady za serbske naležnosće Marja Michałkowa a Leńka Thomasowa kaž tež zastupowaca čłonka załožboweje rady Marlis Młynkowa sedźachu sobu za blidom, zo bychu wo starosćach w gmejnje nastupajo serbsku rěč a kulturu słyšeli.