Župan župy „Handrij Zejler“ sejmarjow sobotu w Ćisku tróšku překwapił

Ćisk (SN/at). Domowinska župa „Handrij Zejler“ Wojerecy a Serbski sejm chcetej hromadźe dźěłać. To je wuslědk wuměny myslow z Wojerowskim županom Marcelom Braumanom na spočatku sobotneho 4. posedźenja serbskeho parlamenta w Ćisku. „Zjawnosć za ćahańcu mjez Domowinu a sejmom žane zrozumjenje nima. Jako Serbja budźemy jenož wuspěšni, wusyłamy-li signal kooperacije“, rjekny Marcel Brauman na kóncu swojich wuwjedźenjow. W nich bě wón mysle přichoda wo skrućenju serbstwa w regionje rysował a so wosebje nastupajo regionalizaciju serbskich zarjadnišćow a prócowanje wo serbskorěčne rumy w kubłanišćach a na wsach wuprajił.