Ćahańca wo wobdźělenje serbskich mustwow na europeadźe njeje nimo

Budyšin/Choćebuz (SN/JaW). Zarjad Domowiny ma dźěłowu skupinu Euro­peada 2020 wutworić. To je Zwjazkowe předsydstwo Domowiny w njezjawnym dźělu posedźenja 15. februara w Budyšinje rozsudźiło. Kaž předsyda Domowiny Dawid Statnik dźensa na naprašowanje wobkrući ma wuběrk runohódnje z čłonow z Hornjeje a Delnjeje Łužicy wobstać. „Wu­běrk ma přihoty na klětuše wuri­sanje koordinować a mjez druhim fi­nancny koncept nastajić kaž tež wubranku zestajeć a treningi organizować.“

Pozadk rozsuda bě ćahańca wo tym, štó měł Serbow na přichodnych europskich koparskich mišterstwach narodnych mjeńšin klětu pola słowjenskeje mjeńšiny w Korutanskej zastupować. Tež w tym prašenju měła nětko jasnosć knježić. Zwjazkowe předsydstwo bě na minjenym posedźenju w Budyšinje tohorunja rozsudźiło, zo maja so Serbja z jednym muskim a jednym žónskim mustwom na europeadźe wobdźělić. Zdobom matej wobě mustwje runo­hódnje z koparkow a koparjow Hornjeje a Delnjeje Łužicy wobstać.