Wojerecy (JaW/SN). Župa „Handrij Zejler“ Wojerecy chce swójski personelny namjet za wólby přichodneje Rady za serbske naležnosće Sakskeje zapodać. To je předsydstwo regionalneho zwjazka srjedu wobzamknyło, kaž župan Marcel Brauman informuje. Tohorunja su rozsudźili, „žadanje ze zjednoćenstwa ‚Serbski sejm‘ za připóznaćom serbšćiny jako druheje cuzeje rěče na šulach podpěrać, kotrež oficialnje jako ‚serbske‘ klasifikowane njejsu“, rěka w zdźělence.

Dale rozprawješe Brauman wo přihotach specielnych informacijow za młode serbske swójby w zwisku z kampanju Wojerowskich měšćanskich zawodow „Město za swójby w krajinje Krabata a jězoriny“. Z njej poskića tamniša bydlenska towaršnosć swójbam nowe a wjetše komfortabelne domicile za přihódnu płaćiznu.

Po kontrowersnej diskusiji je gremij zdobom wobzamknył, naležnosć planowaneho přesydlenja Miłoraza přisłušnej Slepjanskej župje „Jakub Lorenc-Zalěski“ přewostajić a stejišćo njezabrać.