Štyri wosoby za nowu saksku Radu za serbske naležnosće nominowane

Chrósćicy (SN/at). Štyri namjety ma Domowina, jedyn maja serbske komuny Sakskemu krajnemu sejmej za wólby pjećwosoboweje Rady za serbske naležnosće podać. Zwjazkowe předsydstwo Domowiny je na wurjadnym posedźenju předwčerawšim w Chrósćicach rozsudźiło a w tajnych wólbach redaktora Rozhlada Juliana Nyču (21 hłosow, namjetowany wot Škit z.t.) z Budyšina, wučerku Dianu Šołćinu (18, SŠT) z Róžanta, předsydu Domowiny Dawida Statnika (17, Pawk a župa „Michał Hórnik“) z Ralbic a bywšeho direktora Załožby za serbski lud Marka Sucheho (14, Spěchowanski kruh za serbsku ludowu kulturu) ze Sćijec nominowało. Tadej Šiman (TCM) z Chrósćic docpě štyri hłosy, Alexander Pólk (župa „Handrij Zejler“) z Budyšina dwaj. Župy a towarstwa běchu sydom wosobow pomjenowali. Wutoru rano bě Halena Jancyna (Serbski Sokoł) z Ralbic kandidaturu cofnyła, kaž wólbny nawoda Křesćan Korjeńk informowaše. Byrnjež jako předsyda Domowiny hłosowanske prawo měł, je so Dawid Statnik toho wzdał. Wšako bě tež wón mjez požadarjemi.