Na dnju swojich 94. narodnin zemrě wučer, aktiwist Domowinskeho dźěła a prěni po wójnje w diplomatiskej słužbje skutkowacy Serb Měrćin Kaltšmit. Narodźił bě so wón 22. decembra 1925 jako syn dźěłaćerja do jednoreje swójby w Brězynce. Staršej měještaj třoch hólcow na puć do žiwjenja přihotować. Měrćin nawukny powołanje techniskeho rysowarja.

Dalše biografiske daty rěča wo njewšědnym žiwjenju: 1943 dyrbješe młody muž do němskeho wójska, lěto pozdźišo zawlečechu jeho jako wójnskeho jateho do ameriskeje jatby, do Texasa. Jako zrały muž wopyta połsta lět pozdźišo trójce wony zwjazkowy stat USA. A njebě tam jenož na slědach rubjeneje młodosće, ale tež na slědach swojich prjedownikow-wupućowarjow. Jako jaty bě tam jendźelšćinu nawuknył, štož so pozdźišo doma jako wulka duchowna dobrota wopokaza.