Spěwny wječor zarjadowarjam kaž wopytowarjam wulke dožiwjenje był

Hórki (SN/BŠe). Poprawom leži kónčina Morawa na juhu Čěskeje něhdźe 480 kilometrow (pjeć hodźinow) wot Hórkow zdalena. Minjenu sobotu pak bě wona dožiwjomna­ wosrjedź Łužicy, a to na Smolic statoku w Hórkach. Čłonstwo za integraciju ludoweje akordeonoweje kultury (ČILAK) bě sej mjenujcy swój són wo wosebitym spěwnym wječoru z čěskej cymbalowej hudźbu dźakowano sakskemu spěchowanskemu fondsej „Čiń sobu!“ zwoprawdźiło. Přeprosyło je sej ćěleso Cimbálová muzika Stupava z Dolnich Bojanovic, kotrež spěwaše a hudźeše na cymbalu, huslach, kontrabasu a klarineće. A dokelž je mjez Serbami nadosć lubowarjow morawskich štučkow, njespěwachu jeno Češa, ale tež wopytowarjo sobotneho wječora. Nimo toho zanošowachu woni z wulkej zahoritosću zhromadnje znate serbske pěsnje, a to na wjacorych swójskich instrumentach, štož wulkotnu naladu dale a bóle přisporješe.