Hotowarniče katolskeje narodneje drasty na poručenja so dojednali
Kamjenc/Wojerecy (SN/CoR). Poručenja hotowarničow katolskeje narodneje drasty je Kamjenska župa „Michał Hórnik“ wozjewiła. Wuslědk to diskusije prěnjeho zetkanja wjace hač dwaceći hotowarničow 5. měrca w Chrósćicach, kotrež bě župa iniciěrowała. Andrea Pawlikowa z Budyskeho Serbskeho muzeja bě tam z referatom zapřijata.
„Naša narodna drasta je žiwe zhromadne duchowno-kulturne kubło. Tohodla běše župje wažne, nazhonjenja hotowarničow we wuměnje hromadu wjesć. Wšako njemóže ,standard‘ někak ,wothorjeka‘ postajeny, ale dyrbi wupłód dojednanja fachowčow być. Je cyle normalne, zo w běhu tajkeho dlěšeho procesa ke korekturam a wudospołnjenjam dochadźa. Nětk pak je prěni dźěl poručenjow najprjedy raz wuzrawjeny“, rozłožuje regionalna rěčnica Domowiny Katharina Jurkowa, kotraž je lisćinu praktiskich pokiwow zestajała. Zajimcy maja z nimi poručenja za křćensku kmótru, za prěnje swjate woprawjenje, firmowanje, za Bože ćěło a putnikowanje do Róžanta kaž tež žarowansku drastu nastupajo.