Katharina Jurkowa naslěduje po 30 lětach Ludmilu Budarjowu

Chrósćicy (SN/MiR). Wólby noweho předsydstwa Serbskeho šulskeho towarstwa běchu lětsa jónkrótne. Wšako wotměchu so wone pod korona-wobmjezowanjemi w małym kruhu. Na njezjawnym zarjadowanju sobotu w Chróšćanskej „Jednoće“ su jeničce hłosy wuličili.

Za předsydku su po wjetšinje nowi čłonojo předsydstwa ­Katharinu Jurkowu wuzwolili. „Sym dźakowna za dowěru, wjeselu so na zhromadne dźěło z dosć młodym cyłkom, z kubłarjemi, wučerjemi a staršimi. Sym wćipna na nadawki, kiž na nas čakaja a kotrež sej sami stajimy“, rjekny 41lětna Hórčanka po wólbach za nowu předsydku SŠT, kotrež bu 5. januara 1991 załožene.