Domowina chce z TCM a SET wuskutki strukturnych změnow rozjimać

Budyšin (SN/JaW). Domowina chce so z wjednistwom Serbskeho ewangelskeho towarstwa (SET) kaž tež z předsydstwom Towarstwa Cyrila a Metoda (TCM) zetkać. Rozjimać chcedźa aktualne wuwiće nastupajo struktury wosadow cyrkwinskich teritorijow we Łužicy powšitkownje.

Z medijow bu znate, zo njebuchu při wutworjenju strukturow w ewangelskej cyrkwi we Łužicy zajimy ewangelskich Serbow wobkedźbowane, informowaše městopředsyda Domowiny Marko Hančik na posedźenju jeje zwjazkoweho předsydstwa minjeny pjatk w Budyšinje. „Prašam so, hač a w kotrej měrje je třěšny zwjazk w naležnosći reagował a hač njeměli potrjechenym pomoc skićić.“