Lětušu „hłownu“ Domowiny přewjedu pod wosebitymi wuměnjenjemi

Budyšin (SN/JaW). Dawid Statnik je dotal jenički, kiž so wo zastojnstwo předsydy Domowiny prócuje. Za městopředsydow kandidujetaj znowa Marko Hančik a prěni raz dr. Hartmut Leipner. To wobkrući zarjad Domowiny na naprašowanje. Dalše namjety kandidatow ze stron Domowinskich župow a towarstwow dotal žane njepředleža. To pak móža gremije hišće nachwatać, maja-li požadarja abo požadarku za funkciji. Wšako je tež hišće móžno na hłownej zhromadźiznje Domowiny, kotraž budźe 12. junija w Slepjanskim Němsko-serbskim šulskim centrumje, kandidatow a kandidatki namjetować. „Jich pak potom ani delegaća ani zjawnosć do toho zeznać njemóža“, wuswětla nowinski ­rěčnik Domowiny Marcel Brauman. Wšitkich dalšich kandidatow za Domowinske gremije předstaja třěšny zwjazk na swojim nowym blogu pod a šěri informacije wo hłownej zhromadźiznje tež pod hashtagom #slepo120621.