Serbski muski chór Delany 50. róčnicu swojeho załoženja woswjećił
Šunow (SN/bn). Swjedźenski koncert z wjacorymi premjerami, njewočakowani hosćo, někotražkuli překwapjenka a serbska hosćina tworjachu poradźeny ramik złoteho jubileja Serbskeho muskeho chóra Delany, kajkiž je towarstwo spěwarjow předwčerawšim w Šunowskej Fabrikskej hospodźe woswjećiło. „Nětko tu smy a spěwamy. Smy pilnje zwučowali a wjeselimy so, wam njehladajo wobćežnych wobstejnosćow pisany program prezentować móc“, powita předsyda towarstwa Janek Wowčer přitomnych na połnje wobsadźenej žurli. Wón wuzběhny, zo bě kóždy sobuskutkowacy kaž tež kóždy z přeprošenych hosći pak šćěpjeny pak wustrowjeny pak testowany.
