Sta spěwarkow a spěwarjow „Lěto Zejlerja a Kocora 2022“ hódnje skulojćili

Budyšin (SN/bn). „Serbski spěwanski swjedźeń“ bu ze stron zarjadowarjow, potajkim Domowiny, Zwjazka serbskich spěwarskich towarstwow, Serbskeho ludoweho ansambla a Załožby za serbski lud, jako „wjeršk ‚Lěta Zejlerja a Kocora‘ připowědźeny. Dohromady něhdźe 350 spěwarkow a spěwarjow ze 14 chórow resp. spěwacych cyłkow z cyłeje Łužicy je minjenu sobotu tomule narokej wotpowědujo z dotal drje najwjetšim zarjadowanjom swojeho razu w 21. lětstotku pućrubarjow serbskeho wuměłstwa hódnje počesćiło. Wjace hač štyri hodźiny dołho zaspěwachu sej wobdźělnicy w měnjacych so wobsadkach retomas duchownych kaž tež swětnych twórbow spočinarjow serbskeje artificielneje hudźby, čemuž něhdźe 50 přeprošenych hosći na žurli Budyskeje „Króny“ a wjacore sta přihladowarjow wotdoma z livestreamom sćěhowaše.