Sejmarjo z namjetom kubłanskeje awtonomije za hłownu zhromadźiznu

Budyšin (SN/at). „Domowina prócuje so wo to, zo by serbski lud tak chětře kaž móžno dospołnje wyšnostne nadawki we wobłuku statnje financowaneho kubłanja přewzał (kubłanska awtonomija).“ Tuta sada njesteji w naćisku dźěłowych směrnicow 2023-2025, kotrež zwjazkowe předsydstwo třěšneho zwjazka delegatam hłowneje zhromadźizny sobotu w Choćebuzu poruča. W dokumenće delegatneje mapy je aktiwitam pod hesłom „kubłanje w narodnym duchu a dorost“ dotal jeničce wosom linkow wěnowanych. Najebać to, zo dźe tež „wo sposrědkowanje serbskeje rěče“, eksistuje hišće dalši kapitl „serbska rěč“, kotryž prěnjotnje dźěławosći Rěčneho centruma Witaj (RCW) wopřija. Žadanje za kubłansku awtonomiju steji w namjeće „někotrych Domowinjanow w a zwonka Serbskeho sejma“, kotryž chcedźa po zdźělence sejmarja dr. Měrćina Krawca na hłownej zhromadźiznje zapodać. Z tym, tak Krawc, „poda Serbski sejm zaso Domowinje ruku a ju namołwi, šansy kubłanskeje awtonomije zhromadnje wužiwać.“