22. hłowna zhromadźizna Domowiny dźěłowe směrnicy schwaliła a diskusiju programa zahajiła
Choćebuz (SN/at). Diskusija wo nowym programje serbskeho třěšneho zwjazka je zahajena. Zawod k tomu podał je Damian Dyrlich, předsyda wuběrka za nutřkownu demokratiju a serbsku ciwilnu towaršnosć zwjazkoweho předsydstwa, na 22. hłownej zhromadźiznje Domowiny sobotu w Starej chemijowej fabrice w Choćebuzu. „My wabimy Was, lubi delegaća, ale tež Was doma a tam wonka, wšitkich, kotřiž maja zajim, tež hdyž maja prašenja abo tych, kiž chcedźa jenož posłuchać, so na tym wobdźělić, nowy program hromadźe zestajić. Nam za našu Domowinu, za našu narodnu organizaciju program dać, kotryž wjedźe nas do dobreho přichoda“, Damian Dyrlich do šěrokeho sobudźěła namołwješe.