Slepjanski folklorny ansambl ma nětko dopokaz 50lětneje dźěławosće

Slepo (sb/SN/MiR). Serbski folklorny ansambl Slepo je loni w septembru swoje 50lětne wobstaće woswjećił. Nětko, nimale lěto pozdźišo, je wobšěrna chronika wo stawiznach towarstwa dozhotowjena. Mjeztym su mnozy čłonojo lajskeho wuměłskeho ćělesa wjelelětnym přewodnikam, kotřiž su ansamblowcow po mnohich pućach přewodźeli, na kubłanskej jězbje do njedalokich Rěčic na Forest Village Ranch we wjesnym dźělu Walddorf chroniku přepodali. Předsydka ansambla, Stephanie Bierholdtec, wuzběhowaše składnostnje njedawneho zarjadowanja hladajo na přepodaće stawizniskeho dokumenta wulki wuznam ansambla za serbsku zhromadnosć. „Smy hižo wjackróć přehladki swojeje dźěławosće wozjewili, tajku z wjacorych lětdźesatkow skutkowanja pak dotal nic“, wona na napra­šowanje SN wuzběhuje. „Tónkróć smy ­čłonow, něhdyšich a aktualnych wo to prosyli, redakciji chroniki, anekdoty ze swojeho časa aktiwneho skutkowanja podać. A mnozy su pomhali“, wona dale rjekny.