Lětuše myto Domowiny a čestne znamješko swjatočnje spožčili

Budyšin (SN/mb). Štyrjom zasłužbnym Serbam je Domowina pjatk wječor na žurli Serbskeho domu swoje lětuše myto spožiła. Wysoke wuznamjenjenje su z ruki předsydy třěšneho zwjazka Dawida Statnika přijeli Regina Šołćina z Konjec, dr. Michał Hajdan z Drjowka, Sonja Hrjehorjowa ze Sulšec a Lucija Handrikowa ze Smjerdźaceje. Nastupajo Myto Domowiny za dorost je so mytowanski wuběrk rozsudźił, je skupinje Holaski spožčić. Přepodaće myta a čestneho znamješka su na zwučene wašnje ze swjatočnym aktom woswjećili.

Čestne znamješko 2024 su dóstali dr. Křesćan Kessner z Lohmena, dr. Annett Brězanec z Hornjeje Hórki, Marcel Hoza z Worklec, Juro Gera ze Žylowa, Peter Löffler z Choćebuza, Měrko Korjeńk z Małeho Wjelkowa, Marina Kosakowa z Brětnje, Judith Škodźina z Pančic-Kukowa, Pětr Cyž z Budyšina a Ondřej Šrámek z Prahi.