Budyšin (SN/bn). Wustawkam Domowiny „znajmjeńša lětnje jónu zwołać a nawjedować wuradźowanje z předsydami přisłušnych towarstwow a župow“ wotpowědujcy je předsyda třěšneho zwjazka Dawd Statnik wčera na posedźenje w Budyskim Serbskim domje přeprosył. Najwobšěrniši dypk dnjoweho porjada wěnowaše so přihotej 23. hłowneje a wólbneje zhromadźizny, kotraž ma so spočatk klětušeho apryla a Budyšinje wotměć. Na njej chcedźa mjez druhim nowy program Domowiny schwalić, w tym zwisku třeći naćisk bu po słowach Statnika online wozjewjeny a twori wuchadźišćo „za dalše diskusije“. Nastupajo „ trěbne změny wustawkow“ předsyda připowědźi, zapisać tak mjenowanu klawsulu ekstremizma, kotraž ma přistupej přiwisnikam „politisce ekstremneho wusměrjenja“ do gremijam/organam Domowiny zadźěwać. Nimo toho ma so zakótwić, zo njesmědźa přistajeni Domowiny runočasnje w předsydstwje zwjazka skutkować. „Najbytostniša změna“ pak potrjechi nowy wólbny porjad. Přichodnje maja so kandidaća za předsydstwo „zasadnje po wjetšinowym principje wolić“.