Dohromady dźesać zasłužbnych Serbow je Domowina lětsa z Čestnym znamješkom mytowała. Tule chcemy Wam kóždeho z nich bliže předstajić.

Judith Škodźina z Pančic-Kukowa je wusahowaca wosobina w serbskim ludźe, kotraž je wosebje aktiwna na narodno-kulturnym a -nabožnym polu. Runje tak ma wosebity talent we wobłuku hudźby. Hižo zahe pokaza zajim a talent za hudźbu. Wona je swěrna čłonka spěwneje skupiny „Přezpólni“. Wustupy ćělesa prawidłownje na huslach přewodźa. Tež z chórom Lipa je wusko zwjazana. Na hodownych nyšporach w Róžeńće hižo wjacore lěta w smyčkowym kwarteće hraje. Zdobom je tež za někotre načasne serbske šlagry sadźbu za chór napisała.

Na Serbskim gymnaziju w Budyšinje podawa wona předmjetaj serbšćinu a hudźbu. Hudźbu šulerjam wuwučować njeje za nju jenož dźěło, ale wěsta žadosć. Tak nawjeduje po šulskej hudźbje z wulkim angažementom a rozpalitosću chór dorosta. Wona spěchuje młode talenty a pozbudźuje šulerjow, swoje hudźbne kmanosće wuwiwać.