Zwjazkowe předsydstwo puće za cil „100 000 serbowacych“ rozjimało

Kulow (SN/mb). Lětsa posledni raz je so zwjazkowe předsydstwo Domowiny pjatk wječor w Kulowje zešło – w Jakubecec wustawje. A tam su za wukony w delnjoserbšćinje prěni raz myto „młodeje ekscelency“ spožčili. Wjednica Rěčneho centruma WITAJ dr. Beata Brězanowa a wotrjadnik w Choćebuzu Bernd Melcher staj je Maji Melcherojc a Maksimilianej Hasackemu přepodałoj. Wonaj staj z dobrym wuslědkom certifikaciju na wysokim niwowje C1 docpěłoj a so za wožiwjenje delnjoserbšćiny angažujetaj.

Maja Melcherojc je lětsa Delnjoserbski gymnazij wuchodźiła a wukubłuje so na fyzioterapeutku. We wólnym času pisa do „Płomjenja“ a „Noweho Casnika“. Wona je tež čłonka Žylowskeje młodźiny.