Sće sej w pincy swojeho domu abo w zahrodźe hižo kmany blečk wupytali, hdźež sej swójbny bunker zatwariće? Čehodla? Dokelž so ruske wójsko bliži. To je bohužel fakt. Fachowcy su tež hižo wuličili, hdy tak daloko budźe. Za pjeć lět, 2030, změje Putin swoje wójsko dosć wobrónjene a wuhotowane, zo móže sej nadpad na zapadnu Europu dowolić. Wonkowna ministerka Baerbock tež hižo wě, zo přińdu Rusojo přez Pólsku direktnje do Braniborskeje, kaž wona w telewiziji rjekny. To njemóžeš ničo činić. Po tym zo je prezident USA Donald Trump njedawno rjekł, zo njebudźe swoje pjenjezy za zakitowanje Europy dlěje z woknom mjetać, stejimy kaž Jank w liščej jamje.
To jeničke, štož nětko hišće pomha, je masiwne wobrónjenje Němskeje a wšeje Europy, zo móžemy so ruskemu nadpadnikej zmužiće wobarać. Atomowe brónje móhli tež pomhać, te pak Němska bohužel nima. Za to mamy zmužiteho wójwodu Friedricha Merza. Tón so atomoweje wójny scyła njeboji, kaž njedawno rjekny - a nas zhromadnje ze swojimi sobuwojowarjemi do boja powjedźe.
