„Mi je so dźěło we workshopach spodobało. A mi je so lubiło, zo je zwjazkowe předsydstwo po cyłej Łužicy pućowało.“ To praješe Wylem Janhoefer na kóncu swojeho – po dwanaće lětach – poslednjeho posedźenja jako čłon zwjazkoweho předsydstwa zašły pjatk w Chrósćicach. Nan małeje holcy chce wjac chwile za swoju swójbu měć. Tohodla njebudźe hižo na hłownej zhromadźiznje za mandat w nawjedowacym gremiju třěšneho zwjazka kandidować. Njedawno wšak bu znowa do předsydstwa župy Delnja Łužica woleny, tuž wostanje w narodnej organizaciji dale prezentny. Jara aktiwny je nimo toho jako čestnohamtski zamołwity za serbske naležnosće w hamće Bórkowach, kotremuž šěsć gmejnow přisłuša. Janhoefer bydli w najwjetšej z nich, w Bórkowach, pochadźa pak z Prjawoza.