Najwjetša škoda za serbsce wuknjacych: Hdyž Serbja z nimi němcuja

Budyšin (SN/mb). Nimale sto ludźi, mjez nimi 35 online, je prěnju lětušu serbsku debatu wčera na žurli Budyskeho Serbskeho domu sćěhowało. Direktor Sakskeje krajneje centrale za politiske kubłanje (SLpB), dr. Roland Löffler, witaše zajimcow po lońšim rjedźe zarjadowanjow na „druhu staflu“ a dźakowaše so sobuzarjadowarjam – Serbskim Nowinam, Załožbje za serbski lud a Serbskemu institutej – za rjane partnerstwo. Po tym stej moderatorce dr. Lubina Malinkowa a dr. Theresa Jacobsowa režiju přewzałoj. Tema wječora rěkaše „Noworěčnicy: Wutrobnje witani?!100 000 serbowacych a kak dale?“ Nawjazuje na optimistisku wiziju Domowiny a jeje projekta ZARI za rozšěrjenje serbšćiny hač do lěta 2100.