Třidnjowski koparski camp w Ralbicach, kotryž je Serbske šulske towarstwo (SŠT) organizowało, je so pjatk popołdnju z internym turněrom zakónčił. Po tym zo bě so wosebite treningowe lěhwo za młodych serbskich koparjow a koparki jako wuspěšny wopokazało, přewjedźechu jón lětsa druhi raz. Na nim wobdźěli so 40 dźěći ze starobneju klasow D a E, to je wosom dźěći wjace hač loni. Trenar dorostoweje wubranki starobneje skupiny D Tadej Cyž a zamołwići jednotliwych sportowych towarstwow běchu jich nominowali. Zamołwitosć organizowanja campa přewza wospjet sobudźěłaćerka SŠT za swójbne kubłanje Michaela Rabowa zhromadnje z Tadejom Cyžom.