Spěchowanske towarstwo Zetkanišćo Dom Zejlerja a Smolerja je zašły pjatk we Łazu bilancu swojeho dźěła w minjenych dwanaće měsacach sćahnyło a přichodne planowane projekty předstajiło.
Łaz (AK/SN). Dobywać swětej wotewrjenych a kulturnje zajmowanych młodych ludźi wostawa hłowny nadawk Spěchowanskeho towarstwa Zetkanišćo Dom Zejlerja a Smolerja. „To je naše ćežišćo, dokelž dyrbimy swoje towarstwo womłodźić“, podšmórny předsyda Reinhard Schneider minjeny pjatk na hłownej zhromadźiznje.
Swoju domiznisku wustajeńcu chce towarstwo hač do klětušeho za 5 000 eurow přetwarić a rozšěrić. Trěbnych spěchowanskich srědkow nadźijeja so wot Kamjeničanskeho krajneho běrowa za muzejownistwo. Za tuchwilnu rumnosć domizniskeho muzeja zdźěła sej towarstwo nowy koncept, kotryž chcedźa z pomocu Kamjenskeho Muzeja zapadneje Łužicy zwoprawdźić.