Premieram dźe wo pjenjezy
Pomocni policisća přećiwo paducham
Porošenko na wjeršk prošeny
Brüssel (dpa/SN). Statni a knježerstwowi šefojo čłonskich statow NATO su ukrainskeho prezidenta Petra Porošenka na swoje wjerškowe zetkanje do Waršawy přeprosyli. Z Porošenkom planowane zeńdźenje je jasne znamjo, zo so NATO za stabilitu a wěstotu Ukrainy zasadźuje, rjekny generalny sekretar Jens Stoltenberg wčera w Brüsselu. Wot Ruskeje zawinowane połoženje na wuchodźe kraja zamołwitych NATO dale starosća, Stoltenberg rjekny.
Ruska ma přeprošenje Porošenka za prowokaciju. Kraj čuje so wot přibliženja něhdyšeje sowjetskeje republiki k zapadej wohroženy. Tole su w Krjemlu stajnje zaso zwuraznili. Ukraina je wospjet připowědźiła, zo chcyła so swojeho dotalneho neutralneho statusa wzdać a zapadnej zakitowanskej aliancy přistupić. Wjeršk NATO wotměje so 8. a 9. julija.
Hišće raz kaž 2006
Přičinam ćěkanja zadźěwać
Wěcywustojnje wo aktualnym problemje diskutowali
Biskopicy (JK/SN). Komuny a stat su w minjenych měsacach z přijimanjom, zeměstnjenjom a zastaranjom ćěkancow wulke wužadanje zmištrowali. Dźakowano mjezynarodnym politiskim dojednanjam je so ličba ćěkancow čujomnje znižiła. To da wšitkim zamołwitym wodychnyć. Zwostanje pak dosć dźěła a wužadanjow, potrěbnym dale skutkownje pomhać. Jedne z bytostnych prašenjow je, kak hodźeli so přičiny ćěkanja wobmjezować abo wotstronić.
Wo tym a wo dalšich móžnosćach pomocy rěčeć bě zaměr diskusijneho popołdnja zawčerawšim w Biskopičanskej radnicy. Přeprosyła bě na nje zapósłanča CDU w zwjazkowym sejmje Marja Michałkowa. Jako fachowca měješe statneho sekretara w zwjazkowym ministerstwje za zhromadne dźěło a wuwiće Hans-Joachima Fuchtela poboku. Tón zamó wěcywustojnje a na přikłady so złožujo wo pomocnych naprawach Němskeje w krajach Azije a Afriki rozprawjeć.
Integracija so wudani
To a tamne (16.06.16)
70lětny muž w hessenskim Germersheimje je 89lětnu žonu z rolatorom zranił, dokelž njeje ta na jeho začuća reagowała. Z pomocnym nastrojom wón ju wospjet do nohi dyri, přiwołowana policija dźensa zdźěli. Žona bě do toho jemu swoju přichilnosć druhemu mužej wuznała.
Hnydom dwójce při njeskutku lepjeny bu 50lětny šofer wosoboweho awta w Budyskim wokrjesu. Wutoru wječor wón w Halštrowje ze swojim awtom při wuparkowanju do předawanskeje budki zrazy a na to bjez dowolnosće dale jědźeše. Swědcy čisło awta policiji zdźělichu. Tak běchu zastojnicy hrěšnikej spěšnje na pjatomaj. Wopołnocy napadny wobsadce policajskeho awta runje tutón wóz na S 100 pola Błohašec. Při kontroli zastojnicy pytnychu, zo wot muža za alkoholom ćehnješe. Test wunjese 1,66 promilow.
Warnuje před terorizmom
Berlin (dpa/SN). Zwjazkowy nutřkowny minister Thomas de Maizière (CDU) je wobydlerjow hladajo na teroristiske nadpady we wukraju ke kedźbliwosći namołwił. „Dyrbimy z tym ličić, zo dóńdźe k njeskutkam jednotliwcow, skupin a k mjezynarodnje koordinowanym nadpadam“, wón praji. Wobydlerjo dyrbjeli kedźbliwi być, hdyž so swójbni, susodźa abo přećeljo radikalizuja, a měli zamołwite zarjadnišća informować.
Poslednje dobyće za Clinton
Washington (dpa/SN). Hillary Clinton je poslednje předwólby tutoho lěta w USA dobyła. Něhdyša wonkowna ministerka rozsudźi minjenu nóc wothłosowanje demokratow wo móžnym kandidaće za zastojnstwo přezidenta w stolicy Washingtonje jasnje za sebje. Wona zdoby 79 procentow hłosow. Za jeje kontrahenta Bernieja Sandersa hłosowaše jeno 21 procentow ludźi. Clinton ma z tym najlěpše wuhlady, zo při wolenju prezidenta 8. nowembra přećiwo kandidatej republikanow Donaldej Trumpej nastupi.
Njewjedra howrili
Nimale wšědnje dochadźa we Venezueli k raznym protestam přećiwo ...
Naćisk rekordneho budgeta
Drježdźany (dpa/K/SN). Sakska móže dźakowano dobrej konjunkturje telko pjenjez wudać kaž hišće nihdy. Dwójny budget 2017/2018 předwidźi dochody a wudawki we wysokosći 37,1 miliardy eurow. Kwota inwesticijow ma we woběmaj lětomaj 16 procentow wučinjeć.
Ćežišća w etaće budu dale kubłanje, wědomosć a nutřkowna wěstota. Nowe su wudawki za azyl a zintegrowanje ćěkancow. 2016 změje Sakska za to znajmjeńša 800 milionow eurow nałožić, wot Zwjazka dóstanje pak jeno 382 milionow eurow.
Naćisk knježerstwa wobsahuje tež srědki za přidatnje 1 000 nowych městnow pola policije jako wurunanje za donětka wottwarjene. Wjace personala dóstanje zdobom kultus. Z tym reaguje so na přiběrace ličby šulerjow. K tomu ma so přichodnje wjace wučerjow wukubłać.
Nic naposledk přidźěli so komunam telko pjenjez kaž hišće ženje. Za nje je cyłkownje 12,5 miliardow eurow předwidźanych a tak cyła třećina budgeta. K tomu móža hišće přińć srědki z inwesticiskeho programa „Mosty do přichoda“ – 800 milionow eurow hač do 2020.
