To a tamne (07.06.16)
Dorost w sakskim sejmje: W swójskim hnězdźenskim kašćiku su młodej pustawje (Turmfalken) wuhladali, kaž rěčnik sejma Ivo Klatte zdźěli. Mjeno nochcedźa jimaj dać. Doniž njemóžetej lětać, dóstanjetej pustawje „bjezfrakciski status“, Klatte přeradźi. Přichodny tydźeń budźe sejm wo tři pčolace ludy bohatši.
Dwójce w běhu dweju dnjow su dospołnje pjaneho šofera awta w Awstriskej lepili. 40lětny bě njedźelu po narodninskim swjedźenju do kontrole přišoł. Měrjenski nastroj pokazowaše rekordne pjeć promilow. Jězbnu dowolnosć muž dawno žanu wjace njeměješe. Póndźelu je policija šofera znowa kontrolowała. Tónkróć naměri dwaj promilej alkohola.
Koncern EPH přepruwować
Drježdźany (SN/BŠe). Peticija sakskemu financnemu ministrej prof. dr. Georgej Unlandej (CDU) sej žada, zo ma njewotwisne hospodarske pruwowanske předewzaće financnu strukturu čěskeho koncerna EPH přepytować. EPH chce łužisku brunicowu spartu přewzać, štož mějićel Vattenfalla, šwedske knježerstwo, tuchwilu přepruwuje.
Peticiju nastorčiła je čłonka předsydstwa Lěwicy Zhorjelskeho wokrjesa Sabine Kunze, kotraž widźi nastupajo rekultiwowanje brunicoweho regiona wulke ćeže. Wona je zdobom rěčnica krajneho dźěłoweho zjednoćenstwa za wobswět Adele a so z temu brunica hižo dlěje rozestaja. Tak njeje scyła jasne, hač ma čěski koncern EPH dosć financnych rezerwow za rekultiwowanje. Tohodla měło jón sakske knježerstwo dokładnje pruwować. Zdobom měł posudźowar přepytować, kak so płaćizny za milinu w Němskej wuwiwaja, a scenarije k tomu nastajić. Runje tak měła Sakska naprawowy katalog zdźěłać, zo by so před dalšimi kóštami za rekultiwowanje zawěsćiła.
Populisća při wólbach prědku
Rom (dpa/SN). Populistiske hibanje „Pjeć hwězdow“ eurokritiskeho kabaretista Beppy Grilla ma dobre šansy, z wčerawšich wólbow Romskeho wyšeho měšćanosty jako najsylniša móc wuńć. Po dotalnym wuličenju je načolna kandidatka Virginia Raggi (37) hač do 36 procentow hłosow zdobyła a póńdźe tak jako wodźaca dnja 19. junija do rozsudneho koła. Tam nastupi wona přećiwo kandidatej knježerstwoweje demokratiskeje strony Robertej Giachettijej (55). Tón bě 25 procentow hłosow dóstał. Wólbne wobdźělenje wučinješe 65 procentow.
Erdoğan zwuk přiwótřił
Istanbul (dpa/SN). Po rezoluciji Němskeho zwjazkoweho sejma k ludomordarstwu na Armenjanach přez Osmaniske mócnarstwo je turkowski prezident Recep Tayyip Erdoğan zwuk přećiwo Němskej dale přiwótřił. Němska je „posledni kraj“, kotryž směł wo „tak mjenowanym ludomordarstwje“ wothłosować, rjekny Erdoğan statnej powěsćerni Anadolu. Najprjedy dyrbjała Němska zamołwitosć za holocaust a za morjenje 100 000 Hererow w juhozapadnej Africe přewzać.
Žada sej radikalnu změnu
Pčolacy lud ma z pomocu pčołarki Ulriki Richter wot dźensnišeho ...
SPD „ludowa a lěwa“
Pola Falludshe masowy row našli
Na juhu nowe njewjedra móžne
Essen/Aichwald (dpa/K/SN). Wjedrowe wobstejnosće su tajke, zo je meteorologam ćežko abo samo njemóžno wěšćić, kak so wjedro wuwije. Po dny trajacych njewjedrach wosebje w južnej a zapadnej Němskej z dźesatkom mortwych a škodach po miliardach eurow su wočakowane nócne ćežke hrimanja z wulkeho dźěla wuwostali, a z mjezywyšinu je so wjedro nachwilnje polěpšiło.
Rěčnik Němskeje wjedroweje słužby dźensa rano rjekny, zo móže regionalnje přiwšěm k sylnym hrimanjam dochadźeć, wosebje na zapadźe a juhu. W Badensko-Württembergskej hroža wone hłownje w južnim hórskim kraju, zwjazane ze sylnymi dešćemi a wulkimi krupami. Móžne su 25 litrow dešća na kwadratny meter.
To a tamne (06.06.16)
Swój prěni skok z parašutom wuspěšnje zmištrowała je 90lětna ćěłozwučowarka Johanna Quaas z Halle. Po Guinnessowej knize rekordow je wona najstarša ćěłozwučowarka swěta, kotraž so aktiwnje na wubědźowanjach wobdźěla. Při wčerawšim skoku bě jej swětowy mišter w ćěłozwučowanju Eberhard Gienger jako tandem poboku. Wobaj startowaštaj w lětadle AN-2 z lětanišća Böhlen južnje Lipska a přizemištaj bjez problemow. Skok bě dar k 90ćinam Johanny Quaas.
Přewótreje hudźby dla je policija w Frankfurće nad Wódru sobotu rano studentski swjedźeń skónčiła a wótřerěčaki sobu wzała. Party w internaće njebě přizjewjena. Dokelž studenća po prěnim napominanju policije dale swjećachu, přijědźechu zastojnicy z wjacorymi awtami hišće raz. Tónkróć ludźi domoj pósłachu a wótřerěčaki sćazachu.
Nowy zakoń kritizowali
Berlin (dpa/SN). Wot čorno-čerwjeneho zwjazkoweho knježerstwa předpołoženy integraciski zakoń su zastupjerjo opozicije w zwjazkowym sejmje raznje kritizowali. Při dźensnišim prěnim rozjimanju rěčeše zapósłanča Lěwicy Sevim Dağdelen wo integraciji zadźěwacym zakonju, dokelž polěkuje přewšo niskim mzdam. Wulke dźěle zakonja su po jeje słowach kontraproduktiwne. Zastupnicy knježerstwa zakoń porno tomu zakitowachu.
Cameron za EU wabił
London (dpa/SN). Britiski premierminister David Cameron je swojich krajanow namołwił, 23. junija za dalše čłonstwo Wulkeje Britaniskeje w Europskej uniji hłosować. Wustup z EU by hospodarstwu kraja jara zeškodźał, rjekny wón wčera w telewizijnym sćelaku Sky News. Wusyłanje je so hłownje ludowemu wothłosowanju wěnowało. Cameron w tym zwisku na to skedźbni, zo tež mjezynarodne organizacije před wustupom Britow z EU warnuja. Wuslědk referenduma njeje hišće wotwidźomny: Wobě stronje stej tuchwilu někak jenak sylnej.
Hollande: Trjebamy měr
