Pančicy-Kukow (SN/JaW). Kubłanje a šulstwo stej najwažnišej temje w Serbach. To wujewi prěni serbski wječor Domowiny, Rady za serbske naležnosće Sakskeje a Załožby za serbski lud wutoru w Pančicach-Kukowje. Něhdźe 30 zajimcow, mjez nimi tójšto młodostnych, zhoni tak rjec z prěnjeje ruki wo skutkowanju mjenowanych gremijow. Dawid Statnik předstaji jako předsyda Domowiny dźěławosć třěšneho zwjazka, předsydka sakskeje serbskeje rady Marja Michałkowa poda nimo nadawkow rady tež historiski wid na strukturu gremijow, direktor Załožby za serbski lud Jan Budar rozłoži natwar, skutkowanje a ćeže zarjada załožby a jeje rady.
Wjacori přitomni přejachu sej konkretnu pomoc při zwoprawdźenju najwšelakorišich projektow, předewšěm hoberskeje běrokratije dla. Matej Dźisławk skedźbni na to, produkciju serbskich zynkonošakow podpěrać. „Tak rěč na lóštne a zabawne wašnje dale dawamy“, wón měnješe. Jan Budar drje jemu přihłosowaše, skedźbni pak na to, zo spěchowanje hudźby zdźěla tež kreatiwnosć hudźbnikow potłóča.
Wčera měješe w Radworju Běh wo pokal zbóžneho kapłana Alojsa Andrickeho swoju wuspěšnu premjeru. Cyłkownje je so na nim něhdźe 150 sportowčow a sportowcow wobdźěliło.
Radwor (jwo/SN). Wosadny farar Beno Jakubaš witaše wčera dopołdnja při Radworskim sportnišću wobdźělnikow a hosći prěnjeho běha wo pokal zbóžneho Alojsa Andrickeho z krótkim nyšporom. Něhdźe 150 atletow z cyłeje Hornjeje Łužicy je so na to w 13 starobnych skupinach, wot šulskich započatkarjow hač k nazhonitym běharjam, wubědźowało. Dźěći podachu so na 500metrowsku čaru, mjeztym zo dyrbjachu dorosćeni dwaj do šěsć kilometrow zmištrować. Tak běžachu wot Radworskeho sportnišća přez Mały lěs a Młynske chěže samo hač do Bronja. Kóždy z wobdźělnikow smědźeše sam rozsudźić, kak najlěpje wolenu čaru zmištruje: hač z hudźbu na wušomaj, z psom poboku abo z pomocu walkingowych kijow.
Budyšin (kl/SN). Wo móžnych kandidatach do rady Załožby za serbski lud we wólbnej periodźe 2019–2023 je předsydstwo Domowinskeje župy „Jan Arnošt Smoler“ wčera w Serbskim domje w Budyšinje wuradźowało. Hač do 1. nowembra maja so namjety zapodać, tak chcedźa na oktoberskim posedźenje doskónčnje wo župnym namjeće rozsudźić.
Čłonojo předsydstwa dorozumichu so nastupajo naprašnik skupinam a towarstwam Domowiny. Kak hodźał so nanajlěpje rozdźělić, zo bychu prawje wjele sobustawow docpěli? Wuzběhnychu móžnosć naprašnik w interneće wupjelnić.
Składnostnje 750. měšćanskeho jubileja Wojerec podachu so na župnym wulěće po slědach serbskich stawiznow města a zeznachu aktualnu situaciju Serbow we a wokoło Wojerec. W tym zwisku rozjimachu, dalokož je so zaměr jězby, poskitk měć za wšitkich zajimowanych Serbow, tež spjelnił.
Přichodne zarjadowanje župy budźe swójbne popołdnjo 27. oktobra w Pawołskej šuli w Rakecach. Zhromadnje ze šulu so zarjadowanje, kiž započina so w 15 hodź., přihotuje.
Budyšin (SN). Wid čłonow serbskich towarstwow a zwjazkow pod třěchu třěšneho zwjazka a zwonka njeho na swójske skutkowanje chce Domowina z naprašowanja zhonić, kotrež tuchwilu přewjedźe. Nimo ćišćaneho naprašnika a tajkeho jako PDF-dataja, kotraž steji na internetnej stronje Domowiny www.domowina.de za indiwiduelne wućišćenje k dispoziciji, prócuje so zamołwity wuběrk za zjawnostne a lobbyjowe dźěło Domowiny tež wo online-naprašnik. Tutón projekt přewodźaca agentura z Lipska programěruje. Někotrych wudospołnjenjow dla njeje online-naprašnik w interneće hišće přistupny.
Budyšin (SN/at). Hnydom dwaj lawreataj lětušeho Myta Domowiny resp. Myta Domowiny za dorost je Budyska župa „Jan Arnošt Smoler“ namjetowała. Wjelelětnu předsydku Domowinskeje skupiny Baćoń/Haslow Hilžu Mehrowu počesća z najwyšim wuznamjenjenjom třěšneho zwjazka runje tak kaž Bjarnata Rjentša z Choćebuza a rejwansku pedagogowku Alenu Kubankovu z Budyšina.
Nad Mytom Domowiny za dorost smětej so wjeselić skupinje Berlinska dróha, namjet Budyskeje župy, a Deyzidox, wot Kamjenskeje župy podaty.
Čestne znamješko Domowiny 2018 spožča Resi Lotrinje z Hochoze, Sybili Bertramowej z Kózleho, Doris Heincowej ze Žylowa, Danielej Wjenkej ze Smjerdźaceje, Pětrej Korjeńkej z Pančic-Kukowa, Milanej Hrabalej z Warnoćic, Cyrilej Pjechej z Berlina, Lucianej Kaulfürstej z Budyšina, Janej Wawrikej z Chrósćic a Lukašej Novosadej z Prahi.
Mjena počesćenych je mytowanski wuběrk Domowiny dźensa wozjewił. Wuznamjenjenske zarjadowanje budźe pjatk, dnja 5. oktobra, w Budyskim Serbskim domje.
Zwjazk serbskich wuměłcow je na hłownej zhromadźiznje swoje wustawki změnił a wo přichodźe towarstwa wuradźował.
Chrósćicy (SN). Zo by rejowanska skupina Serbskeho folklorneho ansambla Wudwor dale wobstała, pytaja tež lětsa zaso dorost. Jutře, 22. septembra, přewjedu w Chróšćanskej wjacezaměrowej hali „Jednota“ w 15 hodź. mału dźěłarničku. Wsitcy zajimcy w starobje 5. do 7. lětnika su wutrobnje přeprošeni.
Kaž Lucija Smolic z wjednistwa tradiciskeho kulturneho ćělesa zdźěli, chcedźa zajimcam towarstwo předstajić. Po tym budźe proba ze sćoplenjom a wšelakimi rejemi z choreografom. Přizamknje so zhromadny wječor z małym přikuskom a rozmołwu. Njech sej kóždy sportowu drastu sobu přinjese.