Wólbny wuslědk minjenu njedźelu wšelako hódnoćeny

Budyšin/Drježdźany (SN/MkWj). Wuslědk wólbow krajnych sejmow w Saksko-Anhaltskej, Badensko-Württembergskej a Porynsko-Pfalcy su politiske konstelacije w mjenowanych krajach chětro přemjetali. Dotalne knježerstwowe koalicije su wotwolene. AfD je we wšitkich třoch parlamentach zastupjena. Zapósłanča CDU w zwjazkowym sejmje Marja Michałkowa ma to za jasny signal. Wulke wólbne wobdźělenje je jej dopokaz, zo zamó AfD dotalnych njewolerjow mobilizować. Zo je debata wo ćěkancach wšitko přesahowaca tema była, nima wona za spomóžne. To je po jeje słowach njespokojnosći ludźi hišće polěkowało. W krizy ćěkancow dla žada sej Michałkowa rozrisanje na europskej runinje, hewak budźe „hišće hórje“. Strony měli so z argumentami kritikarjow rozestajeć.