Źiwize (HA/SN). Za swoju lětušu 25. hłownu zhromadźiznu je sej Domowinska župa Delnja Łužica wupytała wjes Źiwize­ (Siewisch), kotraž słuša do města Drjowka. Tak chcychu zjawnje wšitke prócowanja připóznawać, kotrež so w Drjowku a jemu přisłušacych wsach na dobro serbstwa přewjeduja. Źiwzize słušeja hižo wjele lět do serbskeho sydlenskeho ruma, hdźež po swojich móžnosćach serbsku rěč, kulturu a tradicije haja, rjekny župan Harald Koncak při witanju něhdźe 70 delegatow a hosći hłowneje zhromadźizny. Mjez nimi bě tež krajny rada wokrjesa Sprjewja-Nysa Harald Altekrüger (CDU), kiž so Domowinje za jeje wobšěrne aktiwity dźakowaše.

W swojej rozprawje pokaza Harald Koncak na to, zo župa Delnja Łužica dale rozrostuje. Mjeztym wobsteji wona ze 40 Domowinskich skupin a 22 towarstwow a ma 2 282 čłonow. To rěka, zo je kóždy třeći čłon Domowiny z Delnjeje łužicy.