Zo je tež dźesać lět po smjerći najwliwnišeho serbskeho spisowaćela 20. lětstotka Jurja Brězana dale dosć wulkeho zajima za jeho twórby, pokaza dobry wopyt njedźelneho zarjadowanja NSLDź „Lausitzer Literatur vorMittag“ w Budyskim Dźiwadle na hrodźe. Składnostnje lětušich stoćin Brězana čitaše tam serbski dźiwadźelnik Marian Bulank z Brězanoweho romana „Bild des Vaters“, kotryž je serbsce z titlom „Stary nan“ wušoł. Po witanskich słowach jednaćelskeje dramaturgowki Budyskeho dźiwadła Eveline Günther, kotraž bě wurězki z twórby wubrała, přednjese je Bulank na jara dostojne wašnje. Ze swojim wurazliwym čitanjom zamó wón nimale 70 připosłucharjow hač do kónca čitanja putać. Dobru hodźinu knježeše napjata ćišina w hač do poslednjeho rynka pjelnjenej hornjej žurli a bě pytnyć, kak jara twórba serbskeho romanciera ludźi hnuje. Brězan wopisuje w njej poslednje žiwjenske dny starca, kiž je so sam ze sobu dojednał na to, zo za wosom dnjow na prawdu Božu woteńdźe.