Žurnalisća chowanje pjenjez wokryli

Mnichow (dpa/K/SN). Korupcija z pjenjezami to njepředstajomneho rozměra: Dźěra w datach panamaskeje prawizniskeje kenclije Mossack Fonseca (MF) wo pozdatnych firmach přinjese po rešeršach mjezynarodnych medijow dźesatki načolnych politikarjow, firmownikow, sławnych sportowcow a druhich do wuskosćow. Z „wotčerpanych“ wjace hač jědnaće milionow dokumentow wuchadźa, zo je mjez zwužitkowarjemi tak mje­nowanych offshore-słužbow dwanaće ně­hdyšich kaž nětčišich šefow statow a knježerstwow kaž tež dalšich 128 po­litikarjow respektiwnje wuznamnych wosobinow. Na te wašnje su woni swoje bohatstwo w dawkowych rajach depo­nowali, zo bychu jeho zdawkowanje w swójskim staće wobešli.