Stanje so Porošenkowy stronjan z nowym premierom?

Kijew (dpa/K/SN). Po dwaj měsacaj trajacej knježerstwowej krizy złoži ukrainski ministerski prezident Arsenij Jacenjuk nětko swoje zastojnstwo. Podwoli so z tym ćišćej prezidenta Petra Porošenka. Składnostnje swojeho tydźenskeho wustupa w telewiziji rjekny 45lětny politikar wčera: „Sym so rozsudźił, wzdać so funkcije premiera“. Jutře zdźěli wón swój rozsud parlamentej. Jeho strona, Ludowa fronta, zwostanje pak dale w prozapadnej koaliciji z Porošenkowym blokom.