„Syriski wječor“ we Wojerecach móžnosć k zetkawanju skićił

Wojerecy (AK/K). Ćěkancy ze Syriskeje trjebaja wobstajnu podpěru a přewod. „Jim zaleži na tym, zo bywaju respektowani“, rjekny farar ewangelskeje wosady Wojerecy-Nowe město Jörg Michel. „Njepřińdu jako prošerjo. Město toho přinjesu bohatu kulturu, historiju a rěč sobu, tak zo móžemy so tomu jenož dźiwać.“

Słowa to na wčerawšim „Syriskim wječoru“, na kotryž bě wjace hač 50 ludźi přišło, mjez nimi mnohe swójby z domu za požadarjow azyla. Zarjadowanje bě wobstatk iniciatiwy „Wodnjo a w nocy za tolerancu“, organizowaneje mjez druhim wot mjenowaneje wosady, Wojerowskeje regionalneje dźěłarnje za kubłanje, demokratiju a žiwjensku perspektiwu.

Zawodnje rozłoži farar Jörg Michel přitomnym stawizny a dalše wažne kajkosće Syriskeje kaž nabožinu abo krajinu. Tohorunja zrysowa wón situaciju kraja. Ze „Syriskim wječorom“ chcył wón zetkawanja zmóžnić, duchowny zwurazni. Bě to zazběh, slědować maja 25. meje „Čečenski wječor“, 22. junija „Irakski wječor“ a 14. septembra „Afghaniski wječor“.