Předsyda Domowiny a braniborski premier so zetkałoj

Podstupim (SN/MkWj). Braniborski ministerski prezident Dietmar Woidke (SPD) je wčera delegaciju Serbow z předsydu Domowiny Dawidom Statnikom na čole witał. W něhdźe hodźinskej rozmołwje w Podstupimskej statnej kencliji dźěše mjez druhim wo přichod brunicoweho regiona we Łužicy kaž tež wo serbski sydlenski rum scyła. Po nowym Serbskim zakonju w Braniborskej mějachu komuny hač do kónca meje składnosć wo to prosyć, zo by so jich přisłušnosć k serbskemu sydlenskemu rumej wobkrućiła. W nutřkownym ministerstwje je mjeztym 30 wotpowědnych próstwow dóšło. Krajne knježerstwo je tuchwilu pruwuje. Komuny maja swoje próstwy hišće wobkrućić. Tež Domowina chce w tym zwisku stejišćo zapodać.

Po zetkanju zwurazni Dawid Statnik chwalbu: „Braniborska je nastupajo spěchowanje mjeńšin minjeny čas tójšto zdokonjała. Za to so statnej kencliji, fachowemu ministerstwu a krajnemu sejmej dźakuju.“