Oświęcim (dpa/SN). Statysacy młodych křesćanow chcedźa we wobłuku swětoweho zetkanja młodźiny z bamžom Franciskusom přichodny tydźeń bywše němske zaničowanske lěhwo Auschwitz-Birkenau wopytać. Po informacijach wopomnišća je so dotal 300 000 putnikow přizjewiło. Za direktora muzeja Piotra Cywińskeho je tole wulke logistiske wužadanje. „Za wšědnje 30 000 wopytowarjow trjebamy přidatne trasy“, wón wuswětla. Bamž Franciskus chce wopomnišćo 29. julija wopytać a so tam ze skupinu přežiwjenych zetkać.