S kupina francoskich šulerjow přebywaše w aprylu we Łužicy, połojca z nich pola šulerjow Worklečanskeje wyšeje šule. Ći tamni běchu hosćo Budyskich serbskich gymnaziastow.
Po 25 hodźinach busoweje jězby witachmy bretonskich přećelow po starym serbskim wašnju z chlěbom a selu. Někotre holcy běchu katolsku drastu woblečene.
Pjatk, prěni dźeń jich přebytka we Łužicy, pokazachmy šulerjam historiske wosebitosće města Budyšina. Pobychmy w Serbskim muzeju a w redakciji Serbskich Nowin. Wječor překwapichmy swojich hosći z małym zetkanjom při wohenju a grilu. Tam přewinychmy prěnje rěčne barjery a so lěpje zeznachmy. Kónc tydźenja přebywachu šulerjo w swójbach. Aktiwity běchu jara wšelakore, hač běchu to prazwěrjenc a labyrint w Małym Wjelkowje, pućowanje po Sakskej Šwicy, płuwanske wjesela abo bowling. Někotři pobychu samo na sankowanskim arealu w Žitawskich horinach. Dalši wzachu swojich hosći sobu na serbsku Božu mšu, hdźež so tući mócnemu spěwanju jutrownych kěrlušow dźiwachu. Tež typiske swójbne swjedźenje móžachu młodźi Bretonojo sobu dožiwić.
