Drježdźany (SN/MkWj). Sakski krajny sejm je dźensa dwudnjowske zakónčace wuradźowanja wo dwójnym etaće swobodneho stata za 2017 a 2018 zahajił. Hišće­ nihdy w swojich stawiznach njeje Sakska telko pjenjez wudać móhła, kaž nětko za přichodnej lěće planuje: dobre 37,5 miliardow eurow.

Posedźenje bě so z raznej debatu wo politice krajneho knježerstwa zahajiło. Ministerski prezident Stanisław Tilich (CDU) pokaza na powšitkownje dobre hospodarske połoženje. Wón připowědźi wobšěrne inwesticije na polu digitalizacije a spěšneho interneta, zo by sakske hospodarstwo na wužadanja přichoda přihotowane było.

Frakciski šef Lěwicy Rico Gebhardt wšak kritizowaše, zo nima knježerstwo wotmołwy na palace politiske prašenja a na přiběracy populizm, ale zo dale čini kaž dotal. Připowědźene naprawy mjenowaše wón „nuzowe rozrisanja“, wosebje w šulskej politice. Korektury předewšěm na dobro dalšeho personala w statnej słužbje su po słowach Gebhardta wuslědk dotalneje wopačneje politiki skrótšenja we wšitkich wobłukach zjawneje słužby.