Podstupim (SN). Wobydlerjo 28 na brunicowych składźišćach stejacych wsow Braniborskeje žadaja sej, w nowym krajnym wuwićowym planje nowe brunicowe jamy zakazać. Wotpowědne stejišćo su zastupnicy Choćebuskeje wobswětoškitneje skupiny zamołwitym za planowanje w Podstupimje přepodali, piše Zelena liga w medijowej zdźělence. Samsny čas je so doba skónčiła, w kotrejž mějachu po­trjecheni přiležnosć, swoje wobmyslenja a pokiwy k Berlinsko-braniborskemu wuwićowemu planej zapodać. „Hórniske pře­dewzaća sej brunicowe jamy kaž Janšojce-sewjer, Bageńc-wuchod abo Grodk-wuchod na kóšty wobydlerjow jako rezerwu dźerža. Wobydlerjo pak maja prawo na planowansku wěstotu“, rjekny René Schuster z Choćebuskeje wobswětoškitneje skupiny. W tym zwisku pokaza wón na Baršćansku měšćansku zhromadźi­znu, kotraž bě minjeny tydźeń žadanjam Zeleneje ligi wotpowědowała a nowe brunicowe jamy wotpokazała. „Krajne knježerstwo dyrbi nětko skónčnje reagować“, tak Schuster.