Na 3. Budyskim wjeršku policija rozprawjała
Budyšin (CS/SN). Na 3. Budyski wjeršk su měšćanscy radźićeljo, předewzaćeljo, dźěłarnicy a Zhorjelski policajski prezident Conny Stiehl přeprošenje zapósłanca CDU w Sakskim krajnym sejmje Marka Šimana wčera do hotela Best Western w sprjewinym měsće sćěhowali. Wón potwjerdźi, zo ma podpěru ze stron swobodneho stata za naprawy, z kotrymiž chcyli połoženje w Budyšinje po namócnosćach před štwórć lětom polěpšić. Tak naliči sylnišu a dołhodobnu prezencu policije w měsće, polěpšenje młodźinskeho dźěła a njedawne přizwolenje nimale jednoho miliona eurow ze spěchowanskeho fondsa za socialne naležnosće. Ze srědkami chcedźa projekty zwoprawdźić, kotrež maja ludźi wšelakich narodow a socialnych worštow mjez sobu zbližić, Šiman rozłoži. Při tym chcedźa mjez druhim tež młodostnych do integraciskeho procesa zapřijeć, kotřiž čuja so špatneho šulskeho wotzamknjenja dla wumjezowani. Šiman žadaše sej při tym podpěru zwjazkoweho knježerstwa, kaž na nowinarskej konferency rjekny.
