Berlin (dpa/SN). Zwjazkowy justicny minister Heiko Maas (SPD) je dojednanje mjez Zwjazkom a krajemi k spěšnišemu wotsunjenju witał. Powěsćerni dpa wón rjekny: „Jenož, hdyž swoje prawidła přesadźimy, móžemy akceptancu ludźi za zapućowanje dołhodobnje zachować.“

Zwjazk a kraje běchu so wčera na 15dypkowy plan dorozumili. W srjedźišću steji rjadowanje, zo móža požadarjow azyla bjez kóždeho wuhlada na to, w Němskej wostać směć, hižo z prěnjeje přebywarnje zaso wróćo pósłać. Jich nochcedźa scyła hakle do komunow słać, zo bychu so tam zažiwili. Ćěkancow, kotřiž z wopačnymi identitami němske instancy jebaja abo su kriminelni, chcedźa raznišo chłostać.

Braniborski ministerski prezident Dietmar Woidke (SPD) plany wita a praji: „Smy dobry wuslědk namakali.“ Zdobom na to pokaza, zo su mnozy wukrajnicy zwólniwi so integrować. Jim dyrbimy tež na dźěłowych wikach šansu dać. „Trjebamy skónčnje zakoń wo zapućowanju.“