„Sym přeco wo tym soniła, dźiwadło hrać“, powěda Anna Zacharijasojc. Jako elewka činohrajneho studija w Budyskim NSLDź ma Delnjoserbowka nětko składnosć, sej tónle són dźěćatstwa z profesionalneho boka zwoprawdźić. Na wuměłstwowym polu pak so w Baršću rodźena hižo dawno doma čuje. Wona je w Choćebuskim Němsko-serbskim ansamblu rejwała, w chórje Delnjoserbskeho gymnazija spěwała, w projektach Piccolo-dźiwadła hrała a je so w spěwanju wukubłać dała.

Připosłucharjo Delnjoserbskeho rozhłosa znaja ju tež jako moderatorku młodźinskeho magacina Bubak. „Sym Witaj-dźěćo, absolutnje – wot pěstowarnje přez zakładnu šulu hač k maturje“, 18lětna wuswětla. Mać je kubłarka w Žylowskej pěstowarni „Mato Rizo“, jeje dźěd Gerat Nagora bě wučer na Delnjoserbskim gymnaziju. Na kóždy pad chce so Anna „do Delnjeje Łužicy wróćić. Delnjoserbšćina je moja domizna. Chcu, zo tež moje dźěći pozdźišo z tej rěču wotrostu.“