21lětny student mašinotwara Daniel Matka po cyłej Němskej jako saksofonist a DJ po puću – jutře budźe Madstep w Chrósćicach
W lěće 2014 je Lejnjan Daniel Matka na Serbskim gymnaziju w Budyšinje maturu złožił. Do pěstowarnje a zakładneje šule chodźeše wón w Pančicach-Kukowje. Dźensa studuje 21lětny mašinotwar w šestym semestrje, a to na Drježdźanskej techniskej uniwersiće. Z přećelku bydli we wysokodomje blisko hłowneho dwórnišća. Připódla wukonja wšelake nadawki za předewzaće energydrinkow RedBull.
Znaty – nic jeno w Serbach – je Daniel jako hudźbnik a DJ. Z dalšimi serbskimi młodymi a nadarjenymi hercami je wón woblubowanu kapału SerBeat załožił. Před štyrjomi lětami su prěni króć jako skupina hudźili, a to na dumpańcy w Prawoćicach. Mnohe serbske młode pory sej kapału rady za swoje kwasne reje skazaja, nic pak jenož. Dožiwichmy SerBeat tež hižo mjez druhim na schadźowance w Budyskej „Krónje“ a na jolkaswjedźenju w Nuknicy. Druhich nadawkow a předewzaćow dla Daniel w skupinje hižo sobu njehraje, wostanje pak dale jeje „čestny čłon“.
